Hello，各位媽媽、各位追求天然生活的朋友。

 

我係 mommy.A，一個每日喺湊仔、家務、工作之間忙到團團轉嘅香港媽媽。

 

呢份手札，唔會有艱深理論，只係我簡單嘅紀錄同真實嘅分享。今日，我想從「mommy.A+b嘅起點」同你哋傾下，點解我會由一個普通用家，走到創立自己手作天然品牌呢條路。老實講，當初純粹係出自一份想守護屋企人嘅「媽媽直覺」。

 

「化學疲勞」的瞬間

一切的轉變，源自我成為媽媽、迎接阿 b（亦即係「mommy.A+b」入面個 b，而家已經係好大個ｂ喇）嚟到呢個世界之後。

同好多新手媽媽一樣，我當時對所有接觸到 BB 嘅嘢都緊張到極點。沐浴露、護膚油、蚊膏……我逐支拎起研究成分表，發現入面一連串冗長嘅成份、化學名詞。我當時成日諗：成分真係愈複雜愈好？

 

真正嘅爆發點，係有次阿 b 用了一支聲稱「全天然」嘅嬰兒潤膚露，皮膚竟然起咗啲小紅點。雖然好快就退咗，但嗰種無力感，我而家都仲記得。我問自己：「身為媽媽，唔通我連每日搽喺小朋友皮膚上嘅係乜嘢都控制唔到？」果一刻我決定，與其去估包裝標籤後面嘅意思，不如試下自己動手做，攞返個自主權，起碼我知道入面放咗啲乜嘢。

 

由廚房到工作枱的安靜實驗

 

我嘅旅程，就喺屋企廚房同嗰張堆滿書嘅工作枱開始。

 

因為呢份「化學疲勞」，我修讀咗香薰治療，亦學習咗中醫營養學。呢段過程令我對東西方嘅草本有更深入嘅了解，我亦試著將呢啲知識融入到產品嘅設計裡面。我發現，大自然其實已經為我哋準備好足夠嘅保護，只係我哋冇好好咁利用！

 

我開始喺屋企實驗，為屋企人調配最簡單、最純粹嘅護理品。用甜杏仁油加薰衣草幫阿 b 輕輕按摩，佢瞓得特別香甜（媽媽終於可以追返少少劇）；老公返工頸梗膊痛，我用薄荷幫佢舒緩一下；夏天多蚊，我就自製檸檬草噴霧。見到家人因為我手作嘅小東西而變得舒爽、放鬆，嗰種滿足感，係買任何名牌都畀唔到我嘅 (哈!)

 

為什麼是「3+8」？一點點對品質的執著

隨著經驗累積，我對原料嘅選擇變得愈來愈挑剔。我明白，最高效且安心嘅狀態，必須建基於最優質嘅基底。

所以，我冇貪心出一大堆產品，反而極度精簡，只揀我最信任、最核心嘅 「3 款基底油」 同 「8 款精油」。

 

關於這 3 款基底油：

 

No.51 有機冷壓甜杏仁油：質地很輕潤，吸收得很快，對於敏感或嬌嫩嘅皮膚，佢能提供一種溫和嘅覆蓋感，幾乎所有膚質都受落。

 

No.52 有機冷壓牛油果油：滲透感很好，含有豐富維生素同埋脂肪酸。如果皮膚覺得乾燥或需要深層滋養，佢就好似一碗滋補湯水咁，幫皮膚打返好個底。

 

No.53 有機冷壓杏桃核仁油：質地比甜杏仁更細緻，親膚性極佳。特別適合面部保養或較薄嘅皮膚，用後皮膚軟滑但唔黏膩。

 

關於這 8 支精油：

 

我揀咗真正薰衣草、薄荷、檸檬草、檸檬、絲柏、澳洲尤加利、廣藿香、生薑。呢幾支係我嘅日常必備，覆蓋了生活最常見嘅需求：蚊叮蟲咬、痛肚發燒、放鬆提神、呼吸順暢、消水腫或者只係想身體暖返一啲。每一支我都親自比較過，確保品質是最原本、最純粹。

 

 

「mommy.A+b」：一個簡單的承諾

呢個名字很直白。「mommy.A」係我，而「b」有雙重意思 : 一係代表我個女(my baby)，亦代表我希望能為你哋嘅家庭（your babies）帶嚟同樣嘅安心。

 

我嘅承諾好簡單：

 

透明：你會清楚知道自己用緊啲乜，好似自家廚房嘅食材一樣放心。

 

真實：只分享我驗證過嘅知識同實用配方。

 

安全：尤其係針對媽媽同小朋友，有咩嘢要注意，我會講清楚。

 

 

邀請你，開始我們共同的天然之旅

寫到呢度，我嘅故事暫告一段落，但呢份手扎先啱啱開始。我開設呢個 Blog，就係想將這些年學到、用到、驗證過嘅智慧，分享俾有同樣需要嘅朋友。

 

接下來，你有咩特別想解決嘅生活煩惱嗎？ 例如想知某隻精油嘅用法，或者關於bb 瞓唔穩、屋企人肌肉痠痛呢類問題？

 

如果你有想了解嘅主題，隨時歡迎你message / inbox我。

 

下一篇我會帶大家快速認識呢 3款基底油 同 8支精油，等大家有個好好嘅基礎先。

 

下次見！

祝你今日都有淡淡嘅天然香氣陪伴。

 

~mommy.A